نئی دہلی: بھارت میں زیر تعمیر دیوار منہدم ہوگئی، جس کے نتیجے میں متعدد مزدور ہلاک ہوگئے۔
عالمی میڈیا کے مطابق حادثہ گروگرام شہر میں پیش آیا جہاں سگنیچر گلوبل سوسائٹی میں تعمیراتی کام جاری تھا کہ اچانک زیر تعمیر دیوار منہدم ہوگئی، جس کے نتیجے میں 12 سے 15 مزدور ملبے تلے دب گئے۔
واقعے کی اطلاع ملتے ہی پولیس اور ریسکیو ٹیمیں فوری مدد کو پہنچ گئیں اور ہیوی مشینری کی مدد سے ملبے تلے دبے مزدوروں کو نکال کر اسپتال منتقل کیا۔ مذکورہ حوالے سے مقامی میڈیا کا کہنا ہے کہ اسپتال پہنچنے کے بعد ڈاکٹروں کی جانب سے 7 مزدوروں کی موت کی تصدیق کی گئی جبکہ 4 مزدوروں کی حالت اب بھی تشویشناک بتائی جا رہی ہے۔ یہ بات بھی علم میں رہے کہ متاثرین نے میڈیا سے گفتگو کرتے ہوئے بتا یا کہ زمین اندر دھنسنے کی وجہ سے دیوار گری ہے۔
