ریاض: امریکی سفارتخانے نے سعودی عرب میں موجود امریکی شہریوں کو فوری طور پر ملک چھوڑنے کی ہدایت جاری کی ہے کیونکہ سعودی فضائی حدود میں میزائل اور ڈرون حملوں کے خطرات میں اضافہ ہو رہا ہے۔
سفارتخانے نے اپنے بیان میں کہا کہ امریکی شہری کمرشل پروازوں کے ذریعے جلد از جلد سعودی عرب سے روانہ ہو جائیں۔ ریاض، جدہ اور دمام کے ایئرپورٹس فعال ہیں اور شہری انخلا کے لیے دستیاب ہیں۔
بیان میں شہریوں کو ہدایت کی گئی ہے کہ وہ سعودی عرب کے وارننگ سسٹم کی ہدایات پر عمل کریں اور اپنی حفاظت کو یقینی بنائیں۔
امریکی سفارتخانے کے مطابق صدر ڈونلڈ ٹرمپ کی اولین ترجیح امریکی شہریوں کی حفاظت اور سلامتی ہے۔ سفارتخانے نے شہریوں کو خبردار کیا ہے کہ موجودہ کشیدہ صورتحال میں فوری احتیاط ضروری ہے تاکہ کسی ممکنہ خطرے سے بچا جا سکے۔
ذرائع کے مطابق انخلا کے اقدامات کا مقصد امریکی شہریوں کو مشرق وسطیٰ میں بڑھتی ہوئی کشیدگی سے محفوظ رکھنا اور انہیں متبادل محفوظ مقامات تک پہنچانا ہے۔
