چلاس: گلگت بلتستان کے علاقے چلاس میں نامعلوم افراد کی پولیس اہلکاروں پر فائرنگ سے 3پولیس اہلکار شہید جبکہ ایک ڈی ایس پی سمیت 4 اہلکار زخمی ہوئے ہیں۔
گلگت بلتستان حکومت کے ترجمان شبیر میر کے مطابق پولیس اہلکار اس علاقے میں پوست کی فصل تلف کرکے واپس آ رہے تھے جس وقت ان پر یہ حملہ ہوا۔
واضح رہے کہ اس علاقے میں پوست کی فصل کو تلف کرنے کا سلسلہ گزشتہ چند روز سے جاری ہے۔
یہ واقعہ سوموار کے روز کی دوپہر ایک بج کر 50 منٹ پر چلاس کے علاقے ’تھور سری‘ میں پیش آیا۔
گلگت بلتستان حکومت کے مطابق پولیس اہلکار اس علاقے میں پوست کی فصل تلف کرکے واپس آ رہے تھے کہ جب 5 سے6 افراد نے پولیس اہلکاروں پر فائرنگ کر دی۔
پولیس کی جانب سے مزید یہ بھی بتایا گیا ہے کہ حملہ آوروں جدید ہتھیاروں سے لیس تھے۔
اس واقعے کے بعد دیامر سے پولیس حکام موقع پر پہنچے جو حملہ آوروں کی گرفتاری کے لیے قائم ٹیموں کی قیادت کر رہے ہیں اور علاقے میں سرچ آپریشن بھی جاری ہے۔
