لاہور: شہر کے مختلف علاقوں میں موسلادھار بارش اور ژالہ باری کے باعث موسم خوشگوار ہونے کے ساتھ ساتھ بجلی کا نظام بھی شدید متاثر ہوگیا۔
بارش لاہور کے مختلف حصوں میں ریکارڈ کی گئی جن میں گلبرگ، گڑھی شاہو، ایبٹ روڈ، ریگل چوک، لکشمی چوک، مسلم ٹاؤن، ماڈل ٹاؤن، مال روڈ، دھرم پورہ، صحافی کالونی، جیل روڈ، کلمہ چوک، مانگ چونگی اور فیروز پور روڈ سمیت متعدد علاقے شامل ہیں۔
لیسکو ذرائع کے مطابق موسلادھار بارش اور تیز ہواؤں کے باعث 100 سے زائد فیڈرز ٹرپ کر گئے، جس سے متعدد علاقوں میں بجلی کی فراہمی معطل ہوگئی۔
حکام کا کہنا ہے کہ بارش کے دوران حفاظتی وجوہات کی بنا پر نظام کو عارضی طور پر بند کیا گیا ہے، جبکہ بارش رکنے کے بعد بجلی کی بحالی کا کام فوری طور پر شروع کیا جائے گا۔
دوسری جانب پنجاب اور سندھ کے کئی علاقوں میں شدید گرمی کی لہر برقرار ہے، جہاں دادو اور جیکب آباد میں درجہ حرارت 51 ڈگری سینٹی گریڈ تک ریکارڈ کیا گیا ہے، جس سے شہریوں کو شدید مشکلات کا سامنا ہے۔
