تمام ذرائع سے تیل کی فراہمی کو ممکن بنانے کے لیے اقدامات کیے جا رہے ہیں ،میڈیا سے گفتگو
فائل فوٹو
لاہور: وفاقی وزیر پیٹرولیم علی پرویز ملک نے کہا ہے کہ تمام ذرائع سے تیل کی فراہمی کو ممکن بنانے کے لیے اقدامات کیے جا رہے ہیں اور حکومت کوئی بھی ایسا فیصلہ نہیں لے گی، جس سے تیل کی دستیابی میں کوئی خلل آئے۔
اُن کا کہنا تھا کہ اگر تیل کی قلت ہوئی تو پھر یہ شاید ایک ہزار روپے فی لیٹر میں بھی نہ مل سکے۔
میڈیا سے گفتگو کرتے ہوئے علی پرویز ملک کا کہنا تھا کہ ’تیل کی قلت کی وجہ سے ہم نے اپنے ہمسایہ ممالک میں افراتفری دیکھی ہے۔ میری بنیادی ذمے داری ہے کہ میں اس طوفان کے سامنے عوام کو تحفظ دُوں اور ہم یہ کوشش آخری حد تک جاری رکھیں گے۔
علی پرویز ملک کا کہنا تھا کہ ’ہمیں نہیں معلوم کہ یہ تنازع کب ختم ہو گا۔ لیکن اس تنازع کی وجہ سے دُنیا میں تیل کی قیمتوں میں 80 فیصد تک اضافہ ہوا، لیکن پاکستان میں 50 فیصد اضافہ ہوا، جو حکومت کی کوشش سے ہی ممکن ہوا۔‘
علی پرویز ملک کا کہنا تھا کہ اکتوبر میں زیرِ سمندر تیل تلاش کرنے کے لیے ترکی کا جہاز پاکستان آ رہا ہے۔
