راجا ارشاد احمد
گاندربل// ضلع گاندربل کے واکورہ علاقے میں دورانِ شب پیش آنے والی ہولناک آتشزدگی کی واردات میں چھ دکانیں اور ان میں موجود لاکھوں روپے مالیت کا سامان جل کر خاکستر ہوگیا۔
مقامی لوگوں کے مطابق، رات کے دوران واکورہ بازار میں واقع دکانوں سے اچانک آگ کے شعلے بلند ہوئے، جس نے دیکھتے ہی دیکھتے قریبی دکانوں کو اپنی لپیٹ میں لے لیا۔ آتشزدگی کے نتیجے میں چھ دکانیں مکمل طور پر جل گئیں جبکہ ان میں موجود لاکھوں روپے مالیت کا مال و اسباب بھی راکھ کے ڈھیر میں تبدیل ہوگیا۔
واقعے کے بعد علاقے میں تشویش کی لہر دوڑ گئی۔ مقامی آبادی نے مطالبہ کیا کہ واکورہ میں فوری طور پر فائر اسٹیشن قائم کیا جائے تاکہ مستقبل میں اس نوعیت کے حادثات کی صورت میں بروقت کارروائی عمل میں لائی جاسکے اور قیمتی جان و مال کو تحفظ فراہم کیا جاسکے۔
آتشزدگی کی وجوہات اور نقصان کا مکمل تخمینہ لگایا جا رہا ہے۔
