جنوبی ہندوستانی فلم انڈسٹری کے مشہور میوزک ڈائریکٹر انیرودھ روی چندر جلد ہی سن گروپ کے چیئرمین کلاندھی مارن کی بیٹی اور انڈین پریمیئر لیگ (آئی پی ایل) کی ٹیم سن رائزرز حیدرآباد (ایس آر ایچ) کی سی ای او کاویا مرن سے شادی کرنے جا رہے ہیں۔ اس شادی کی خبر کی تصدیق خود تلنگانہ کے وزیراعلیٰ اے ریونت ریڈی کے دفتر نے کی ہے۔
تلنگانہ کے وزیراعلیٰ اے ریونت ریڈی کے دفتر نے سوشل میڈیا پلیٹ فارم ’ایکس‘ پر ایک پوسٹ شیئر کی۔ پوسٹ میں بتایا گیا کہ سن گروپ کے چیئرمین کلاندھی مارن اور ان کی اہلیہ کاویری مارن نے جوبلی ہلز میں واقع رہائش گاہ پر تلنگانہ کے وزیراعلیٰ اے ریونت ریڈی سے ملاقات کی اور انہیں اپنی بیٹی کاویا مرن کی شادی کے استقبالیے میں شرکت کی دعوت دی، جو 21 نومبر کو چنئی میں منعقد ہوگا۔ حالانکہ شادی کی تاریخ اور تقریب کی مکمل تفصیلات کا باضابطہ اعلان الگ سے نہیں کیا گیا ہے۔
یہ بھی پڑھیں :
واضح رہے کہ معروف میوزک کمپوزر انیرودھ کو سب سے پہلے ’کولاویری ڈی‘ نغمے سے بڑی مقبولیت ملی تھی۔ اس کے بعد انہوں نے آہستہ آہستہ جنوبی ہندوستانی فلم انڈسٹری میں اپنی مضبوط شناخت بنا لی۔ انہوں نے ’کیتھی‘، ’لیو‘ اور ’وکرم‘ سمیت کئی ہٹ فلموں کے نغمے اور بیک گراؤنڈ میوزک تیار کیے۔ شاہ رخ خان کی فلم ’جوان‘ کی میوزک بھی انہوں نے ہی تیار کی تھی۔ اس کے بعد گزشتہ سال ریلیز ہونے والی رجنی کانت کی فلم ’کولی‘ کی میوزک بھی انہوں نے دی۔ ان کے حالیہ کام کی بات کریں تو رجنی کانت کی فلم ’جیلر 2‘ میں بھی انیرودھ کی ہی میوزک ہے۔ اس کے علاوہ سال کے آخر میں ریلیز ہونے والی شاہ رخ خان کی فلم ’کنگ‘ کی میوزک کی ذمہ داری بھی انہی کے کندھوں پر ہے۔ دلچسپ بات یہ ہے کہ انیرودھ نے جن فلموں میں موسیقی دی، ان میں سے زیادہ تر فلمیں ان کے ہونے والے سسر کلاندھی مارن نے پروڈیوس کی ہیں۔
