چین میں ٹینکر پھٹنے سے ہولناک تباہی‘ 10ہلاک‘ 117 زخمی

بیجنگ (انٹرنیشنل ڈیسک) چین میں ایک خوف ناک حادثے میں کم از کم 10 افراد ہلاک اور 117 زخمی ہوگئے۔ خبررساں اداروں کے مطابق یہ حادثہ ہفتے کے روز مشرقی صوبے ژجیانگ کے شہر وینلینگ کے قریب ایک ہائی وے پر ایک آئل ٹینکر کے پھٹنے سے پیش آیا۔ دھماکا اتنا زوردار تھا کہ قریب واقع درجنوں مکان، دکانیں اور دیگر عمارتیں تباہ ہوگئیں۔ دھماکے کے ساتھ ہی شعلے اور دھواں بھی ہر طرف پھیل گیا، جس کے نتیجے میں کئی گاڑیاں جل کر خاکستر ہوگئیں۔ مقامی پولیس کا کہنا ہے کہ حادثے کے بعد کئی شاہراہیں بند کردی گئیں اور حادثے کی وجوہات جاننے کے لیے تحقیقات شروع کردی گئی ہے۔ امدادی کارکن رات گئے ملبے میں دبے افراد کی تلاش کے لیے کارروائی کرتے رہے۔