مسقط: اومان کے سلطان ہیثم بن طارق آل سعید نے پہلی مرتبہ نئے ولی عہد کے تقرر اور پارلیمان کے کام سے متعلق نئے بنیادی قانون کا اعلان کیا ہے۔
اومان کی سرکاری خبررساں ایجنسی کے مطابق اس نئے قانون میں شہریوں کو مزید آزادیاں اور حقوق کی ضمانت دینے میں ریاست کے کردار پر زوردیا گیا ہے۔
اومانی سلطان کے جاری کردہ نئے قانون کے تحت ولی عہد کے تقرر اور اس کے فرائض منصبی کا میکانزم وضع کیا گیا ہے جبکہ رپورٹ میں یہ نہیں بتایا گیا ہے کہ اومان کا نیا ولی عہد کون ہوگا اور نہ اس ضمن میں مزید تفصیل فراہم کی گئی ہے۔
خیال رہے نئے ضابطے میں میں قانون کی حکمرانی اور عدلیہ کی آزادی کواومان میں نظم ونسق کی اساس قرار دیا گیا ہے۔
واضح رہے سلطان ہیثم بن طارق نے ایک سال قبل سلطان قابوس بن سعید کی وفات کے بعد اقتدار سنبھالا تھا ۔