نیویارک (انٹرنیشنل ڈیسک) خانہ جنگی کے 10 سال مکمل ہونے پر شام کے لیے اقوام متحدہ کے خصوصی مندوب گیر پیڈرسن نے شامی عوام کو درپیش ناانصافی، غربت، اموات اور بنیادی حقوق کی خلاف ورزیوں جیسے مسائل کا تذکرہ کرتے ہوئے کہا ہے کہ عالمی برادری شامی عوام کے مسائل حل کرنے میں بری طرح ناکام رہی ہے۔ سلامتی کونسل کے اجلاس سے خطاب میں انہوں نے کہا کہ شامی بحران کے حل میں پیشرفت کے لیے اندرونی اور بیرونی طور پر اہم فریقوں کو اپنے اپنے موقف میں لچک دکھانا ہو گی۔ انہوں نے مزید کہا کہ شامی شہری بیک وقت 5 فوجوں کو اپنی سرزمین پر لڑتے دیکھ رہے ہیں۔ ان میں ترکی، روس اور ایران کی افواج کے علاوہ داعش کے جنگجو شامل ہیں۔ اقوام متحدہ کے عہدے دار نے شام میں بگڑتے ہوئے حالات زندگی اور بڑھتی ہوئی غربت اور بدحالی کے بارے میں خبردار کیا۔ گیرپیڈرسن کا کہنا تھا کہ شامی عوام جس بحران سے گزر رہے ہیں، اس کے اثرات نسلوں تک محسوس کیے جائیں گے۔دوسری جانب شام میں آمریت کے خلاف عوامی تحریک کی دسویں سالگرہ کے موقع پر حکومت مخالف مظاہرے کیے گئے۔ حزب اختلاف کے زیرانتظام شمال مغربی صوبے ادلب میں عوام نے انقلابی پرچم اٹھا کر جمہوریت کے حق میں نعرے لگائے۔