اسلام آباد: وزیراعظم عمران خان کا کہنا ہے کہ نوجوانوں کی کثیر تعداد پر سخت محنت کر رہے ہیں۔
معاون خصوصی برائے نوجوانان عثمان ڈار نے وزیراعظم عمران خان سے ملاقات کی اور انہیں کامیاب جوان پروگرام کے 2 سال مکمل ہونے پر کارکردگی رپورٹ پیش کردی۔
رپورٹ کے مطابق ایک لاکھ سے زائد نوجوانوں کو جدید ہنر اور تکنیکی مہارت سکھائی گئی، کامیاب جوان اسکل اسکالرشپ پروگرام میں بھی 5 ارب روپے جاری کیے گئے، رقم کی تقسیم ملک بھر کے نوجوانوں میں بلا تفریق میرٹ اور شفافیت کی بنیاد پر ہوئی۔
رپورٹ میں کہا گیا کہ یوتھ انٹرپینورشپ اسکیم کے تحت 30 ارب روپے کی رقم تقسیم ہوئی، 2 سال میں 35 ارب روپے سے زائد کی رقم نوجوانوں میں تقسیم ہوئی۔
وزیراعظم نے ملاقات میں کہا کہ ہنر کے ذریعے نوجوانوں کی استعداد کار میں اضافہ کیا جاسکے گا، نوجوان کسی بھی معاشرے میں تبدیلی کا اصل محرک ہوتے ہیں، پاکستان کا 68 فیصد حصہ 30 سال سے کم عمر لوگوں پر مشتمل ہے۔