اسلام آباد: پاکستان تحریک انصاف نے اسلام آباد میں جلسے اور دھرنے کی اجازت دینے کے لیے عدالت میں دائر درخواست واپس لے لی۔ اسلام آباد ہائیکورٹ نے تاجروں کی درخواست نمٹا دی۔
پی ٹی آئی کی اسلام آباد میں جلسے اور دھرنے کی اجازت سے متعلق درخواست پر اسلام آباد ہائیکورٹ میں سماعت ہوئی۔ اس موقع پر پاکستان تحریک انصاف کے وکیل نے سماعت کے دوران درخواست واپس لینے کی استدعا کی۔
اسلام آباد ہائیکورٹ کے چیف جسٹس عامر فاروق نے تحریک انصاف کی جانب سے درخواست واپس لینے کی استدعا منظور کرتے ہوئے کہا کہ دھرنے سے متعلق سپریم کورٹ اور اسلام آباد ہائیکورٹ کا فیصلہ موجود ہے۔ اگر راولپنڈی میں کچھ ہوتا ہے تو بھی اسلام آباد آنے والوں کو دشواری ہوسکتی ہے۔
چیف جسٹس نے ریمارکس دیے کہ کنٹینرز لگانا کوئی مسئلے کا حل نہیں ہے، انتظامیہ کوئی جدید طریقہ اپنائے، ریاست کے سامنے کوئی کھڑا نہیں ہوسکتا۔
