لاہور: سابق ٹیسٹ اوپنر رمیز راجا کو یکم جنوری سے ایک لاکھ 54 ہزار روپے ماہانہ پنشن ملے گی، جس کے لیے ان کا نام پنشن پانے ولاے سابق ٹیسٹ کرکٹرز کی فہرست میں باقاعدہ طور پر شامل کرلیا گیا ہے۔
نجی ٹی وی کی رپورٹ کے مطابق پاکستان کرکٹ بورڈ کے سابق چیئرمین نے پنشن کے لیے بنائے گئے کوڈ آف کنڈکٹ پر دستخط بھی کردیے ہیں۔ قبل ازیں انہوں نے پی سی بی سے پنشن کے لیے درخواست کی تھی۔ ذرائع کے مطابق رمیز راجا کو پنشن پاکستان کرکٹ بورڈ (پی سی بی) کے قانون کے تحت دی جائے گی۔
واضح رہے کہ گزشتہ برس اگست میں رمیز راجہ 60 سال کی عمر کو پہنچ چکے ہیں اور قانون کے مطابق پی سی بی 60 سال سے زیادہ عمر کے حامل سابق ٹیسٹ کرکٹرز کو پنشن دے رہا ہے۔ اہم بات یہ ہے کہ رمیز راجا نے بطور سربراہ پی سی بی پنشن میں فی کس ایک لاکھ روپے کا اضافہ کیا تھا۔