لاہور: پنجاب کے گورنر بلیغ الرحمان نے صوبائی اسمبلی کے انتخابات سے متعلق سنگل بینچ کے فیصلے کی تشریح کے لیے لاہور ہائی کورٹ سے رجوع کرلیا۔
نجی ٹی وی کے مطابق گورنر پنجاب نے ایڈووکیٹ شہزاد شوکت کے توسط سے سنگل بینچ کے فیصلے کی وضاحت کے لے لاہور ہائی کورٹ سے رجوع کیا ہے۔ اس سلسلے میں دائر کی گئی درخواست میں کہا گیا ہے کہ سنگل بینچ نے الیکشن کمیشن کو تاریخ سے متعلق گورنر سے مشاورت کا حکم دیا ہے لیکن گورنر کے پاس ایسا کوئی آئینی اختیار نہیں جب کہ گورنر نے اسمبلی تحلیل پر دستخط ہی نہیں کیے۔
واضح رہے کہ عدالت کے حکم پر الیکشن کمیشن کے وفد نے صوبائی اسمبلی کے انتخابات کی تاریخ کے لیے گورنر پنجاب بلیغ الرحمان سے ملاقات کی تھی، جس میں چیف سیکرٹری، انسپکٹر جنرل پولیس پنجاب بھی شریک تھے۔
عدالت کے سنگل بینچ نے الیکشن کمیشن کو صوبائی اسمبلی کے انتخابات کی تاریخ کا اعلان کرنے اور گورنر سے مشاورت کے بعد نوٹیفکیشن جاری کرنے کا حکم دیا تھا، جس پر گورنر پنجاب نے صوبے میں الیکشن کے حکم کی وضاحت کے لیے لاہور ہائیکورٹ جانے کا فیصلہ کیا تھا۔