کراچی:سندھ ہائیکورٹ نے شہری سمیت دیگر لاپتا افراد کا سراغ لگانے کے لئے جے آئی ٹیز تشکیل دینے کا حکم دیدیا۔
جسٹس نعمت اللہ پھپلپھوٹو کی سربراہی میں دو رکنی بینچ کے روبرو شہری سلطان محمود سمیت دیگر کی بازیابی سے متعلق درخواستوں کی سماعت ہوئی۔
پولیس حکام نے بتایا کہ سلطان محمد، احمد علی، سید رضا زیدی اور دیگر کی بازیابی کے لیے اقدامات کررہے ہیں۔ لاپتا افرادکی بازیابی کے لیے مہلت دی جائے۔ عدالت نے ریمارکس دیئے کہ ایس ایچ اوز محکمہ داخلہ سندھ سے رابطہ کرکے جے آئی ٹیز تشکیل دینے کا بندوبست کریں۔
عدالت نے پولیس لاپتا افرادکا سراغ لگانے کے لئے جے آئی ٹیز تشکیل دینے کا حکم دے دیا۔ عدالت نے محکمہ داخلہ سندھ، آئی جی سندھ اور دیگر سے 30 مئی کو رپورٹ طلب کرلی۔ عدالت نے لاپتا افراد کی بازیابی کے سنجیدہ اقدامات کرنے کا حکم دیدیا۔