اسلام آباد: وزیر دفاع خواجہ آصف کا کہناہےکہ پی ٹی آئی کی حکومت ہوتی تو ملک ڈیفالت کر چکا ہوتا ہم نے ملک کو ڈیفالٹ ہونے سے بچا لیا ہے، نئی اسمبلی کے لئے سب سے بڑا مسئلہ معیشت ہوگی۔ سانحہ 9 مئی کی جتنی بھی مذمت کی جائے کم ہے ،آرمی تنصیبات پر اقتدار کے لئے حملہ کیا گیا،ایک شخص نے اقتدار کی خاطر سب داؤ پر لگا دیا ۔
قومی اسمبلی کے الوداعی اجلاس سے اظہار خیال کرتے ہوئے وزیر دفاع کا کہنا تھا کہ،کل ایک شخص اپنے وکیلوں سے کہہ رہا تھا مجھے نکالو،اس شخص نے تحفے بیچے پیسے اپنے پاس رکھ لیئے ، 2 دن جیل میں گزارے اب کہتا ہے مجھے نکالو،یہاں پر بہت سے لوگ ایسے ہیں جو قید و بند میں تھے ۔
انہوں نے کہا کہ گزشتہ 23 سالوں سے اسمبلی نے اپنی مدت پوری کی ،پارلیمنٹ کے تقدس کو ہر حال میں بحال رکھنا ہے ،پارلیمنٹ کا احترام آہستہ آہستہ کم ہونا شروع ہو گیا ، بہت چیزیں ایسی بھی ہیں جس پر شرمندگی ہے۔
ان کا کہنا تھا کہ اگلی اسمبلی کے لئے سب سے بڑا مسئلہ معیشت کا ہوگا ، جس پر قوی حکمت عملی اپنانی پڑے گی ، دہشت گردی خلاف جنگ آج بھی جاری ہے ۔