تہران: ایران کے روحانی پیشوا خامنہ ای نے کہا ہے کہ غزہ میں کارروائیوں میں امریکا ملوث ہے جس کے ہاتھ تمام مظلوموں کے خون سے رنگے ہوئے ہیں، غزہ میں اسرائیلی قتل و غارت گیری کو امریکا منظم کر رہا ہے۔
ایرانی سپریم لیڈر نے کہا کہ حماس نے اسرائیل کو ایسا دھچکا پہنچایا ہے جس کی کوئی بھی توقع نہیں کر رہا تھا، اسرائیل اور مغربی ممالک حماس کے حملے کے بعد سے تلملا رہے ہیں اور معصوم شہریوں پر بمباری کرکے بدلہ لے رہے ہیں۔
روحانی پیشوا نے غزہ کے عوام کے صبر کی تعریف کرتے ہوئے کہا کہ غزہ کے شہریوں نے اپنے حوصلے اور نقل و حرکت کو برقرار رکھا ہے اور آئندہ بھی رکھیں گے، حماس کے جانباز بھی جوابی کارروائی کے لیے تیار کھڑے ہیں۔
انہوں نے کہاکہ اسرائیل کے خلاف ایران نے اپنا کردار ادا کیا ہے، اب بھی ایران حماس کے ساتھ کھڑا ہے، لبنان پر اسرائیلی جارحیت ختم کرنے کے لیے عالمی ادارے اپنا کردار ادا کریں۔
