الیکشن کمیشن کے بلاوے پر سیکریٹری فنانس نے حکام سے ملاقات کی، میڈیا کے سوالات پر سیکریٹری خزانہ امداد اللہ بوسال نے الیکشن کمیشن کو فنڈر فراہم کرنے کی یقین دہانی کروا دی۔ کہا کہ الیکشن کمیشن کو ایک دو روز میں فنڈز جاری کر دیں گے۔
عام انتخابات کیلئے الیکشن کمیشن کو مطلوبہ فنڈز کی فراہمی کے معاملہ پر الیکشن کمیشن آف پاکستان کے بلاوے پر سیکریٹری فنانس نے حکام کو بریفنگ دی۔جس میں بتایاگیا کہ الیکشن کمیشن کو آئندہ انتخابات کیلئے فوری طور پر 17 ارب روپے درکار ہیں، البتہ وزارت خزانہ سے اب تک صرف 10 ارب روپے ملے ہیں۔
ذرائع الیکشن کمیشن کے مطابق باقی رقم کی فراہمی بغیر کسی معقول جواز کے تعطل کا شکار ہے۔
اسلام آباد میں ای سی پی حکام سے ملاقات کے بعد صحافیوں سے گفتگو کرتے ہوئے وفاقی سیکریٹری خزانہ امداد اللہ بوسال نے الیکشن کمیشن کو فنڈر فراہم کرنے کی یقین دہانی کروا دی۔
سیکریٹری خزانہ نے کہا کہ الیکشن کمیشن کو ایک دو روز میں مطلوبہ فنڈز جاری کردیں گے، ای سی پی کو جتنے فنڈر درکار ہوں گے، فراہم کئے جائیں گے۔