اسلام آباد: صدرِ مملکت آصف زرداری نے ایرانی صدر ابراہیم رئیسی سے ٹیلی فون رابطہ کرتے ہوئے غزہ میں جاری اسرائیلی جارحیت پر اظہار تشویش کرتے ہوئے اسرائیل سے فوری جنگ بندی کا مطالبہ کیا ہے۔
میڈیا رپورٹس کے مطابق آصف زرداری نے ایرانی صدر کو عید کی مبارکباد پیش کرتے ہوئے پاکستان کے دورے کی دعوت پیش کی ، دونوں رہنماؤں نے درپیش سیکیورٹی چیلنجز پر قابو پانے کے لیے معلومات کا تبادلہ بڑھانے کی ضرورت پر زور دیا۔
صدرمملکت نے ٹیلی فون پر گفتگو کرتے ہوئے غزہ کی صورت حال پر بھی تبادلہ خیال کرتے ہوئے کہا کہ اسرائیل کو غزہ میں فوری جنگ بندی کرنی چاہیے، نہتے فلسطینیوں کو بے دردی سے شہید کیا جارہاہے، اقوام متحدہ کی سلامتی کونسل کی قرارداد کے تحت فوری جنگ بندی ہونی چاہیے۔