غزہ اور مغربی کنارے میں اسرائیلی فوج کے وحشیانہ مظالم کا سلسلہ جاری ہے۔ اسرائیلی فوج کے حملوں میں مزید 14 فلسطینی شہید اور متعدد زخمی ہو گئے ہیں۔
فلسطینی وزارت صحت کے مطابق وسطی غزہ میں برج پناہ گزین کیمپ پر بمباری کے نتیجے میں 11 افراد شہید اور متعدد زخمی ہوگئے۔ شہید اور زخمیوں میں خواتین اور بچے بھی شامل ہیں۔
اسرائیلی فورسز نے غزہ کی پٹی میں اہداف کو نشانہ بنایا، عینی شاہدین نے جنوبی شہر رفح کے ارد گرد فضائی حملوں کی اطلاع دی۔
مصر کے ساتھ غزہ کی سرحد پر واقع شہر میں پناہ گزین شہریوں کی حفاظت پر بین الاقوامی اعتراضات کے باوجود اسرائیل نے مئی کے اوائل میں رفح میں اپنی فوجی دراندازی شروع کی تھی۔
عینی شاہدین نے بتایا کہ اسرائیلی حملے رفح کے علاقے کے ساتھ ساتھ وسطی غزہ کے نوصیرات پر بھی ہوئے۔ جبالیہ پناہ گزین کیمپ اسرائیلی بمباری سے ملبے کا ڈھیر بن گیا ہے۔
UNRWA کے مطابق اسرائیلی فوج کے حملوں کے خوف سے گزشتہ دو دنوں کے دوران تقریباً 32 ہزار فلسطینی رفح چھوڑ کر دیگر مقامات پر منتقل ہو گئے ہیں۔
اسرائیل کی فوج نے مصر کے ساتھ غزہ کی سرحد کا مکمل کنٹرول حاصل کر لیا ہے، جسے فلاڈیلفیا کوریڈور کہا جاتا ہے، اس بات کی علامت ہے کہ اس نے بین الاقوامی مذمت کے باوجود اپنی زمینی کارروائی کو تیز کر دیا ہے۔