اسلام آباد :الیکشن کمیشن آف پاکستان ( ای سی پی ) نے اسلام آباد میں بلدیاتی انتخابات 29 ستمبر کو کروانے کا اعلان کردیا۔
میڈیا رپورٹس کے مطابق اپنے اعلامیہ میں ای سی پی کا کہنا ہے کہ اسلام آباد میں بلدیاتی انتخابات کے لیے ریٹرننگ افسر پبلک نوٹس آویزاں کریں گے۔ کاغذات نامزدگی 16سے 20اگست تک جمع کروائے جاسکیں گے۔
اعلامیہ میں مزید کہا گیا کہ کاغذات نامزدگی کی جانچ پڑتال 22 اگست سے 26 اگست تک ہوگی، کاغذات نامزدگی منظور یا مسترد ہونے کے خلاف اپیلیں 27 سے 29 اگست تک دائر ہوں گی۔
ای سی پی کا کہنا تھا کہ کاغذات نامزدگی واپس لینے کی تاریخ 5 ستمبر ہے، امیدواروں کو انتخابی نشانات 6 ستمبر کو الاٹ ہوں گے، اس دوران ایگزیکٹیو اتھارٹی اسلام آباد میں کسی نئی اسکیم کا اعلان نہیں کریں گی۔