غزہ(صباح نیوز) فلسطینی وزارت صحت کے اسسٹنٹ انڈر سیکریٹری ڈاکٹر عبداللطیف الحاج نے کہا ہے کہ اسرائیل کی جانب سے پٹی پر شروع کی گئی جنگ میں زخمی ہونے والوں کو صحت کے نظام کی تباہی کے نتیجے میں تقریباً نصف ملین زخمیوں کے سرجیکل آپریشنز کی ضرورت ہے۔الحاج نے اناطولیہ نیوز ایجنسی کے ساتھ انٹرویو میں وضاحت کی کہ “غزہ میں 94 ہزار سے زیادہ زخمی ہیں اور انہیں جنگ کے بعد اوسطاً 3 سے 4سرجیکل آپریشنز کی ضرورت ہے۔انہوں نے مزید کہا کہ”جنگ کے بعد زخمیوں پر کی جانے والی سرجریوں کی تعداد نصف ملین تک پہنچ سکتی ہے”۔انہوں نے مزید کہا کہ یہ ضروری آپریشن مکمل سرجیکل ٹیموں اور غزہ کے کے باقی ہسپتالوں سے ملحق فیلڈ ہسپتالوں کو سہولیات فراہم کیے بغیر نہیں کیے جاسکتے۔ڈاکٹر الحاج اس وقت اپنے دو پوتوں کے ساتھ ترکیہ میں مقیم ہیں جو غزہ کی جنگ کے دوران زخمی ہوئے تھے۔طبی صلاحیت کا 70 فیصد سے زیادہ کا نقصانان کا کہنا ہے کہ قابض اسرائیلی فوج کے ہسپتالوں پر بمباری اور انہیں سروس سے محروم کرنے کی وجہ سے غزہ میں صحت کا نظام اپنی طبی صلاحیت کے70 فیصد سے زائد کی تباہی سے دوچار ہے۔فلسطینی طبی اہلکار نے وضاحت کی کہ جیسے ہی فائرنگ بند ہوتی ہے ہسپتالوں کی بحالی اور طبی آلات، ادویات اور طبی سامان لانے کے لیے تیزی سے کوشش کی جانی چاہیے۔انہوں نے غزہ میں حقیقی اور موثر فیلڈ ہسپتالوں کی ضرورت پر زور دیا جس میں انٹیگریٹڈ سرجیکل آپریٹنگ رومز کے علاوہ ریڈیولوجی کے آلات، ایم آر آئی مشینیں، سی ٹی اور لیبارٹری اسکینز اور توانائی کے بحران کو حل کرنے کے لیے جدید الیکٹرک جنریٹرز کی ضرورت ہے۔الحاج نے نشاندہی کی کہ غزہ میں موجودہ 14 ہسپتالوں میں سے صرف 4 اہم ہسپتال کام کر رہے ہیں اور باقی کچھ چھوٹے اور غیر سرکاری مراکز ہیں۔انہوں نے بتایا کہ غزہ میں وزارت صحت نے اسرائیلی فوج کی جانب سے ہسپتالوں کو دانستہ طور پر نشانہ بنانے کے بعد صحت کی خدمات فراہم کرنے والی ہر عمارت کو استعمال کرنے کی کوشش کی۔