کراچی: نئے مون سون سسٹم کی آمد کے تحت 4 ستمبر بروز بدھ کو کراچی میں گرج چمک کے ساتھ بارش ہونے کی توقع ہے۔
رپورٹ کے مطابق محکمہ موسمیات کے ارلی وارننگ سینٹر نے پیش گوئی کی ہے کہ مشرقی سندھ میں مون سون کی ہوائیں داخل ہو رہی ہیں، جس کے نتیجے میں کراچی میں بارش کا امکان بڑھ گیا ہے۔
اس دوران شہر میں مغربی اور جنوب مغربی سمت سے ہوائیں چلنے کی توقع ہے، جبکہ ہوا میں نمی کا تناسب صبح کے وقت 80 سے 90 فیصد اور شام کے وقت 60 سے 75 فیصد رہنے کا امکان ہے۔
محکمہ موسمیات کے مطابق دیہی سندھ کے مختلف اضلاع میں بھی 3 سے 4 ستمبر کے دوران متعدل سے تیز اور کہیں کہیں موسلادھار بارشیں ہو سکتی ہیں، جس کے باعث مقامی انتظامیہ کو احتیاطی تدابیر اختیار کرنے کی ہدایت کی گئی ہے۔