لاہور (آن لائن) وزیر اطلاعات پنجاب عظمیٰ بخاری نے کہا ہے کہ قانون توڑنے والوں کیخلاف کارروائی ہوگی، پختونخوا میں جو تبدیلی اور انقلاب لائے ہیں وہ قوم کو بتائیں، پنجاب میں نئے اسپتال بن رہے ہیں اسپتالوں کی ری ویمپنگ ہو رہی ہے۔ انہوں نے بیرسٹر سیف کے بیان پر ردعمل کا اظہار کرتے ہوئے کہا کہ خیبر پختونخوا میں فنڈز کی عدم دستیابی پر یونیورسٹیاں بند ہو رہی ہیں، کے پی میں سرکاری ملازمین آئے روز تنخواہوں کی عدم ادائیگی پر احتجاج کرتے ہیں، شریف خاندان کے بغض میں آپ اندھے،گونگے اور بہرے ہو چکے ہیں۔ تحریک انصاف سمیت جو بھی قانون توڑے گا اس کے خلاف کارروائی ہوگی، نو مئی کے شر پسندوں اور بلوائیوں کے ساتھ لاڈلے بچوں والا سلوک نہیں کیا جا سکتا۔