لندن(انٹرنیشنل ڈیسک) برطانیہ میں طوفان برٹ کے دوران شدید بارشسے نظام زندگی درہم برہم ہوگیا۔ برطانوی میڈیا کے مطابق مختلف واقعات میں 5 افراد ہلاک ہوچکے ہیں۔ رپورٹ کے مطابق طوفان کے دوران لندن سے ویسٹ انگلینڈ اور ویلز تک آمدورفت معطل ہوگئی،جب کہ ملک بھر میں روڈ، ریل، ائر، فیری سروس متاثر ہے۔ ملک بھر میں 161 فلڈ وارننگز اور 213 فلڈ الرٹس جاری کیے گئے جب کہ ویلز میں 22 فلڈ وارننگز اور اسکاٹ لینڈ میں سیلاب کے 4 انتباہات جاری کیے گئے ہیں۔ جنوبی ویلز میں مختلف مقامات پر 100 ملی میٹر تک بارش ریکارڈ کی گئی ہے۔