کراچی: ڈمپر کی ٹکر سے نوجوان کی ہلاکت اور اس کے بعد ہونے والی ہنگامہ آرائی کے کیس میں ڈمپر ایسوسی ایشن کے صدر لیاقت محسود کی عبوری ضمانت منظور کرلی گئی۔
انسدادِ دہشت گردی عدالت میں رامسوامی واقعے سے متعلق دو مقدمات کی سماعت ہوئی، جن میں نوجوان کی ہلاکت اور بعد ازاں ہونے والی توڑ پھوڑ شامل ہے۔
عدالت نے لیاقت محسود کی دونوں مقدمات میں عبوری ضمانت منظور کرتے ہوئے 50، 50 ہزار روپے کے مچلکے جمع کرانے کا حکم دیا۔
درخواست گزار کے وکیل حیدر فاروق جتوئی کے مطابق گارڈن تھانے میں ملزم پر دو مقدمات درج ہیں، جبکہ سیشن عدالت نے ان میں دہشت گردی کی دفعات شامل کرنے کی ہدایت بھی کی تھی۔
پولیس کے مطابق لیاقت محسود پر الزام ہے کہ حادثے کے بعد وہ اپنے مسلح گارڈ کے ہمراہ ہنگامہ آرائی اور شہریوں پر تشدد میں ملوث تھا۔
اس سے قبل سیشن عدالت ملزم کی درخواستِ ضمانت مسترد کر چکی ہے۔
