ایران نے امریکا اور صہیونی حکومت کے خلاف مزاحمت کے دوران شہید ہونے والوں کی یاد میں تین روزہ سوگ کا اعلان کر دیا ہے۔
سرکاری میڈیا کے مطابق آج دوپہر تہران کے انقلاب اسکوائر میں انقلاب کے حق میں ایک بڑی ریلی منعقد کی جائے گی۔ یہ اعلان ایسے وقت سامنے آیا ہے جب ملک بھر میں گزشتہ دو ہفتوں سے جاری بدامنی کے دوران ہلاکتوں میں اضافہ ہوا ہے، جس کا ذمہ دار ایران امریکا اور اسرائیل کو قرار دیتا ہے۔
ایرانی میڈیا سے گفتگو کرتے ہوئے صدر مسعود پزشکیان نے کہا کہ امریکا اور اسرائیل ایران میں افراتفری اور عدم استحکام پھیلانا چاہتے ہیں۔ ان کا کہنا تھا کہ دونوں ممالک اپنے مذموم مقاصد کے حصول کے لیے ایران میں فسادات کو ہوا دے رہے ہیں، تاہم ایرانی عوام کو چاہیے کہ وہ فسادیوں اور دہشت گردوں سے خود کو الگ رکھیں۔
صدر پزشکیان نے عوام پر زور دیا کہ وہ شرپسند عناصر کو انتشار پھیلانے کی اجازت نہ دیں اور اس بات پر یقین رکھیں کہ حکومت انصاف کے قیام کے لیے پُرعزم ہے۔
واضح رہے کہ ایران میں گزشتہ 14 دنوں سے احتجاجی مظاہرے جاری ہیں، جبکہ ایک ایرانی انسانی حقوق تنظیم کے مطابق دو ہفتوں کے دوران ہونے والے مظاہروں میں 192 افراد ہلاک ہو چکے ہیں۔
