مناما: صدر مملکت آصف علی زرداری کو بحرین کے سرکاری دورے کے دوران ملک کا اعلیٰ ترین سول ایوارڈ عطا کر دیا گیا، صدر زرداری کو یہ ایوارڈ پاکستان اور بحرین کے درمیان دوطرفہ تعلقات کے فروغ اور ان کی گرانقدر خدمات کے اعتراف میں دیا گیا۔
سرکاری میڈیا کے مطابق صدر آصف علی زرداری کی قصر القضیبیہ آمد پر انہیں گارڈ آف آنر پیش کیا گیا، جس کے بعد ان کی بحرین کے فرمانروا شاہ حمد بن عیسیٰ آل خلیفہ سے ملاقات ہوئی۔ ملاقات میں دونوں رہنماؤں نے پاکستان اور بحرین کے برادرانہ تعلقات کو مزید مضبوط بنانے اور انہیں نئی جہت دینے کے عزم کا اعادہ کیا۔
اس موقع پر صدر مملکت کو بحرین کا اعلیٰ ترین ایوارڈ وسام الشيخ عيسى بن سلمان آل خليفة من الدرجة الأولى عطا کیا گیا۔ یہ اعزاز دونوں برادر ممالک کے درمیان دوطرفہ تعلقات کے فروغ میں صدر آصف علی زرداری کی خدمات کے اعتراف میں دیا گیا۔
صدر مملکت اور شاہ حمد بن عیسیٰ آل خلیفہ کے درمیان ون آن ون ملاقات میں پاک بحرین تعلقات کی مثبت سمت پر اطمینان کا اظہار کیا گیا، جبکہ تجارت اور سرمایہ کاری کے شعبوں میں تعاون بڑھانے پر تفصیلی گفتگو ہوئی۔ صدر آصف علی زرداری نے بحرینی سرمایہ کاروں کو پاکستان میں سرمایہ کاری کی دعوت دیتے ہوئے زراعت، آئی ٹی، صحت، سیاحت اور انفرااسٹرکچر کے شعبوں میں مشترکہ منصوبوں پر زور دیا۔
ملاقات کے دوران دفاع اور سلامتی کے شعبوں میں تعاون کو پاک بحرین تعلقات کا اہم ستون قرار دیا گیا، جبکہ عالمی اور علاقائی صورتحال پر بھی تبادلۂ خیال کیا گیا۔ دونوں رہنماؤں نے اتحاد، تحمل اور باہمی مشاورت کی اہمیت پر زور دیا اور اقوام متحدہ سمیت عالمی فورمز پر قریبی رابطہ برقرار رکھنے پر اتفاق کیا۔
صدر مملکت نے بحرین میں مقیم پاکستانی کمیونٹی کو دوطرفہ تعلقات کا مضبوط پل قرار دیتے ہوئے بحرین میں مقیم ایک لاکھ 16 ہزار پاکستانیوں کے لیے سہولیات فراہم کرنے پر بحرینی قیادت کا شکریہ ادا کیا۔ اس موقع پر کنگ حمد یونیورسٹی اسلام آباد کو پاک بحرین دوستی کی علامت قرار دیا گیا۔
شاہ حمد بن عیسیٰ آل خلیفہ نے صدر آصف علی زرداری کے دورے کو دوطرفہ تعلقات میں ایک اہم سنگِ میل قرار دیتے ہوئے بحرین میں پاکستانی کمیونٹی کے مثبت کردار کو خراجِ تحسین پیش کیا۔
بعد ازاں صدر مملکت آصف علی زرداری اور ان کے وفد کے اعزاز میں ظہرانے کا اہتمام بھی کیا گیا۔
