کراچی میں ایم کیو ایم پاکستان کے رہنماؤں کی سکیورٹی سے متعلق معاملہ ختم ہوگیا ہے اور ذرائع کے مطابق پارٹی قیادت کو پولیس سکیورٹی دوبارہ فراہم کر دی گئی ہے۔
ایم کیو ایم کے چیئرمین خالد مقبول صدیقی، وفاقی وزیر مصطفیٰ کمال، فاروق ستار اور انیس قائم خانی کو سکیورٹی واپس دے دی گئی ہے۔
ذرائع کا کہنا ہے کہ سندھ اسمبلی میں اپوزیشن لیڈر علی خورشیدی سے بھی پیپلزپارٹی کے ایک رہنما نے رابطہ کیا ہے اور انہیں بھی سکیورٹی واپس ملنے کا امکان ہے۔ اس پیش رفت کے بعد سکیورٹی سے متعلق پیدا ہونے والی سیاسی کشیدگی میں کمی آتی دکھائی دے رہی ہے۔
دوسری جانب سینئر صوبائی وزیر شرجیل انعام میمن نے کہا ہے کہ ایم کیو ایم اس معاملے کو پروپیگنڈے کے طور پر استعمال کر رہی ہے۔ ان کا کہنا تھا کہ جب لوگ اپنے پیاروں کی لاشیں تلاش کر رہے تھے تو سیاست کی جا رہی تھی، وزیر داخلہ پہلے ہی واضح کر چکے ہیں کہ ایم کیو ایم کے وزرا سے سکیورٹی واپس نہیں لی گئی۔
واضح رہے کہ وزیر داخلہ سندھ ضیاء لنجار نے بھی سکیورٹی واپس لینے کی خبروں کی تردید کرتے ہوئے کہا تھا کہ جن افراد کو قانون اور سکیورٹی کے تقاضوں کے تحت سکیورٹی دی گئی ہے وہ بدستور فراہم کی جا رہی ہے، جبکہ مصطفیٰ کمال نے سکیورٹی معاملے کو گل پلازہ سانحے پر تنقید سے جوڑا تھا۔