اوٹاوا: کینیڈا کے صوبے برٹش کولمبیا کے ایک دور افتادہ قصبے میں ایک اسکول اور گھر پر فائرنگ کے واقعے میں کم از کم 10 افراد جان کی بازی ہار گئے جن میں مبینہ حملہ آور بھی شامل ہے، جبکہ 25 سے زائد افراد زخمی ہوئے، جن میں بعض کی حالت تشویشناک بتائی جا رہی ہے۔
بین الاقوامی خبر رساں اداروں کے مطابق فائرنگ کے 2 مختلف مقامات تھے، ایک مقامی اسکول اور دوسرا قریبی رہائش گاہ۔ اسکول کے اندر 6 افراد مردہ حالت میں پائے گئے جب کہ ایک زخمی شخص اسپتال منتقل کیے جانے کے دوران دم توڑ گیا۔ اس کے علاوہ مزید 2 لاشیں ایک گھر سے برآمد ہوئیں۔
پولیس کا کہنا ہے کہ مشتبہ حملہ آور بھی اسکول کی عمارت کے اندر مردہ پایا گیا اور ابتدائی شواہد کے مطابق اس نے خود کو گولی ماری۔
زخمیوں میں سے 2 افراد کو ایئر ایمبولینس کے ذریعے بڑے طبی مرکز منتقل کیا گیا ہے، جہاں انہیں انتہائی نگہداشت میں رکھا گیا ہے۔ مقامی انتظامیہ نے فوری طور پر علاقے کو گھیرے میں لے کر سیکورٹی سخت کردی اور کمیونٹی کو یقین دہانی کرائی کہ فی الحال کسی مزید خطرے کے شواہد نہیں ملے۔
یہ واقعہ ایک ایسے قصبے میں پیش آیا جہاں آبادی چند ہزار افراد پر مشتمل ہے اور جرائم کی شرح نہایت کم رہی ہے۔ اس لیے اس سانحے نے نہ صرف مقامی رہائشیوں بلکہ پورے صوبے کو صدمے میں مبتلا کردیا ہے۔ اطلاعات کے مطابق واقعے کے بعد والدین اپنے بچوں کی خیریت جاننے کے لیے اسکول کے باہر جمع ہوگئے اور فضا سوگوار مناظر پیش کرتی رہی۔
پولیس تاحال حملے کے محرکات کا تعین نہیں کر سکی تاہم تفتیشی عمل جاری ہے۔ حکام کا کہنا ہے کہ ہر پہلو سے جائزہ لیا جا رہا ہے، بشمول ممکنہ نسلی بنیادوں پر نفرت کا عنصر۔
