ہوانا: کیوبا میں اچانک پیش آنے والے بڑے بلیک آؤٹ نے ملک کے وسیع علاقوں کو تاریکی میں ڈبو دیا جس کے نتیجے میں روزمرہ زندگی شدید متاثر ہو گئی۔
خبر رساں اداروں کے مطابق دارالحکومت ہوانا سمیت مختلف شہروں میں بجلی کی فراہمی بند ہونے سے ٹریفک، سرکاری امور اور مواصلاتی نظام میں شدید خلل پیدا ہو گیا۔
سرکاری توانائی ادارے کے مطابق بجلی کے اس بڑے بحران کی بنیادی وجہ ایک اہم تھرمو الیکٹرک پاور پلانٹ کی اچانک بندش بتائی جا رہی ہے۔
یہ پاور پلانٹ ہوانا سے تقریباً 100 کلومیٹر مشرق میں واقع ہے اور قومی بجلی نظام میں مرکزی کردار ادا کرتا ہے۔ اس کی غیر متوقع بندش نے پورے پاور گرڈ پر دباؤ بڑھا دیا جس کے نتیجے میں کئی علاقوں میں بجلی کی فراہمی معطل ہو گئی۔
حکام کے مطابق اس واقعے کے بعد مغربی صوبے پینار ڈیل ریو سے لے کر مشرقی صوبے لاس توناس تک متعدد علاقوں میں بجلی کا نظام مفلوج ہو گیا۔ اس صورتحال نے شہریوں کے لیے شدید مشکلات پیدا کر دیں اور کئی مقامات پر کاروباری سرگرمیاں بھی متاثر ہوئیں۔
ریاستی میڈیا کے مطابق ملک پہلے ہی توانائی کے شدید بحران کا شکار ہے۔ ایندھن کی کمی کے باعث بجلی پیدا کرنے والے کئی پاور پلانٹس مکمل استعداد کے ساتھ کام نہیں کر پا رہے جس سے توانائی نظام پر مسلسل دباؤ برقرار ہے۔
ماہرین کا کہنا ہے کہ حالیہ مہینوں میں ایندھن کی قلت مزید بڑھ گئی ہے جس کی وجہ سے بجلی پیدا کرنے والے یونٹس کی کارکردگی کمزور ہو گئی ہے۔ اس صورتحال کے باعث بجلی کے نظام میں بار بار تکنیکی مسائل سامنے آ رہے ہیں۔
مقامی ذرائع کے مطابق دارالحکومت ہوانا میں اچانک بجلی بند ہونے سے ٹریفک سگنلز کام کرنا چھوڑ گئے جس کے نتیجے میں سڑکوں پر شدید ٹریفک جام دیکھنے میں آیا۔ کئی اسپتالوں اور اہم اداروں میں ہنگامی جنریٹرز چلائے گئے تاکہ ضروری خدمات جاری رکھی جا سکیں۔
اسی طرح متعدد علاقوں میں موبائل فون اور انٹرنیٹ سروس بھی متاثر ہوئی جس کے باعث شہریوں کو رابطے میں مشکلات کا سامنا کرنا پڑا۔ کئی لوگوں نے خدشہ ظاہر کیا کہ اگر توانائی کا بحران برقرار رہا تو مزید طویل بلیک آؤٹ کا سامنا کرنا پڑ سکتا ہے۔
حکومت کا کہنا ہے کہ بجلی کی بحالی کے لیے اقدامات شروع کر دیے گئے ہیں اور ماہرین تکنیکی خرابی کو دور کرنے میں مصروف ہیں، تاہم حکام نے یہ بھی تسلیم کیا ہے کہ مکمل بحالی میں وقت لگ سکتا ہے کیونکہ توانائی نظام پہلے ہی دباؤ کا شکار ہے۔
حیران کن بات یہ ہے کہ اسی دوران مشرق وسطیٰ کے ملک عراق میں بھی بجلی کا بڑا بریک ڈاؤن سامنے آیا ہے جس نے پورے ملک کو تاریکی میں ڈبو دیا۔
ماہرین کے مطابق دنیا کے مختلف حصوں میں توانائی نظام کو درپیش مسائل اس بات کی نشاندہی کرتے ہیں کہ عالمی سطح پر توانائی کے شعبے کو بڑے چیلنجز کا سامنا ہے۔