ریاض: مشرقِ وسطیٰ میں بڑھتی ہوئی کشیدگی کے دوران سعودی عرب کو حالیہ دنوں میں متعدد میزائل اور ڈرون حملوں کا سامنا کرنا پڑا ہے، سعودی وزارتِ دفاع کے مطابق فضائی دفاعی نظام نے زیادہ تر حملوں کو ناکام بنا دیا۔
سعودی حکام کے مطابق ایران کی جانب سے 28 فروری کے بعد سے خطے میں میزائل اور ڈرون حملوں کا سلسلہ شروع ہوا جس میں خلیجی ممالک میں موجود امریکی فوجی تنصیبات اور اہم انفراسٹرکچر کو نشانہ بنانے کی کوشش کی گئی۔ ان حملوں کے دوران سعودی عرب کے مختلف علاقوں، خصوصاً دارالحکومت ریاض اور اس کے اطراف کو بھی نشانہ بنانے کی کوشش کی گئی۔
وزارتِ دفاع کے مطابق سعودی فضائی دفاعی نظام نے اب تک متعدد ڈرون اور میزائل راستے میں ہی تباہ کر دیے۔ تازہ واقعے میں ریاض کے مشرق میں ایک ڈرون کو اپنے ہدف تک پہنچنے سے پہلے ہی مار گرایا گیا۔
اس سے قبل ریاض کے جنوب مشرق میں واقع الخرج صوبے میں پرنس سلطان ایئر بیس کی جانب داغا گیا ایک بیلسٹک میزائل غیر آباد علاقے میں گر گیا۔ سعودی حکام کے مطابق اس واقعے میں کسی قسم کا جانی یا مالی نقصان نہیں ہوا۔
سعودی فوج کے مطابق حملوں کا بنیادی ہدف فوجی اڈے، تیل کی تنصیبات اور اہم شہری مراکز تھے، مؤثر فضائی دفاع کے باعث بڑے پیمانے پر نقصان سے بچاؤ ممکن ہوا۔ بعض علاقوں میں ڈرون یا میزائل کے ملبے گرنے سے معمولی نقصان کی اطلاعات سامنے آئیں لیکن کسی بڑے جانی نقصان کی تصدیق نہیں ہوئی۔
سعودی حکومت کا کہنا ہے کہ ملک کا دفاعی نظام مکمل طور پر الرٹ ہے اور کسی بھی ممکنہ خطرے سے نمٹنے کے لیے تمام ضروری اقدامات کیے جا رہے ہیں۔
دوسری جانب ایران کا مؤقف ہے کہ یہ حملے امریکا اور اسرائیل کی جانب سے ایران کے خلاف جاری فوجی کارروائیوں کے ردعمل میں کیے جا رہے ہیں۔
