اقوام متحدہ کے ذیلی ادارے انٹرنیشنل میری ٹائم آرگنائزیشن میں ایران کے نمائندے نے واضح کیا ہے کہ آبنائے ہرمز کی آبی گزرگاہ مخصوص شرائط کے ساتھ کھلی ہے، تاہم یہ سہولت صرف ان جہازوں کے لیے دستیاب ہے جو ایران کے بقول اس کے “دشمنوں” سے منسلک نہ ہوں۔ اس بیان کو خطے میں جاری کشیدہ صورتحال کے تناظر میں ایک اہم پیش رفت کے طور پر دیکھا جا رہا ہے۔
ایران کے نمائندے علی موسوی نے اپنے موقف میں کہا ہے کہ اگر متعلقہ جہاز تہران کے ساتھ حفاظتی امور پر رابطہ قائم کر لیں تو آبنائے ہرمز سے گزرنے میں کسی رکاوٹ کا سامنا نہیں ہوگا۔
انہوں نے اپنے بیان میں اس بات پر بھی زور دیا کہ ایران کی ترجیحات میں سفارت کاری کو مرکزی حیثیت حاصل ہے جارحیت کا خاتمہ اور باہمی اعتماد کی بحالی اس سے کہیں زیادہ اہم امور ہیں۔
علی موسوی نے موجودہ کشیدگی کا ذمہ دار ایران کے خلاف امریکا اور اسرائیل کی کارروائیوں کو قرار دیتے ہوئے کہا کہ یہی عوامل آبنائے ہرمز میں پیدا ہونے والی موجودہ صورتحال کی بنیادی وجہ ہیں۔
ایران کے نمائندے نے کہا کہ اس حساس آبی راستے میں آمدورفت کو منظم رکھنے کے لیے ایران اپنی نگرانی اور حفاظتی اقدامات جاری رکھے ہوئے ہے، تاکہ کسی بھی ناخوشگوار واقعے سے بچا جا سکے
یاد رہے کہ 28 فروری کے بعد سے، جب ایران اور امریکا و اسرائیل کے درمیان کشیدگی ایک کھلی جنگی صورتحال میں تبدیل ہوئی، تہران کی جانب سے وقتاً فوقتاً آبنائے ہرمز سے گزرنے والے بعض بحری جہازوں کو نشانہ بنانے کے واقعات رپورٹ ہوتے رہے ہیں، جس کے باعث عالمی سطح پر توانائی کی ترسیل اور بحری تجارت کے حوالے سے خدشات میں اضافہ ہوا ہے۔ اس اہم آبی گزرگاہ کی بندش یا اس میں کسی بھی قسم کی رکاوٹ عالمی معیشت پر گہرے اثرات مرتب کر سکتی ہے، کیونکہ دنیا کی بڑی مقدار میں تیل اسی راستے سے منتقل ہوتا ہے۔
