امیر جماعت اسلامی کراچی منعم ظفر خان نے حکومت کی جانب سے پیٹرولیم مصنوعات کی قیمتوں میں اضافے کو شدید تنقید کا نشانہ بناتے ہوئے کہا ہے کہ حالیہ فیصلے کے ذریعے عوام پر مہنگائی کا ایک نیا بوجھ ڈال دیا گیا ہے اور گویا ان پر “ڈرٹی بم” گرا دیا گیا ہو، گزشتہ ایک ماہ کے دوران پیٹرول کی قیمت میں 63 فیصد اضافہ ہو چکا ہے جو عوام کی قوتِ خرید کے لیے ناقابلِ برداشت ہے۔
کراچی میں ادارہ نور حق میں پریس کانفرنس کرتے ہوئے امیر جماعت اسلامی کراچی منعم ظفر خان نے کہا کہ ملک کی معاشی صورتحال اس نہج پر پہنچ چکی ہے کہ ہر پیدا ہونے والا بچہ بھی لاکھوں روپے کے قرض کے ساتھ دنیا میں آ رہا ہے، لیکن اس کے باوجود حکمران طبقے کی شاہ خرچیاں کم ہونے کے بجائے بڑھتی جا رہی ہیں، ایک جانب عوام کو مہنگائی اور قرض کے بوجھ تلے دبایا جا رہا ہے جبکہ دوسری جانب حکمران اپنی آسائشوں اور مراعات میں اضافہ کر رہے ہیں۔
امیر جماعت اسلامی کراچی نے مزید کہا کہ بعض اعلیٰ حکومتی شخصیات کی جانب سے مہنگے اثاثوں کی خریداری جاری ہے، جس میں طیارے اور مہنگی گاڑیاں شامل ہیں جبکہ عام شہری کے لیے پیٹرول تک مہنگا کر دیا گیا ہے، یہ صورتحال اس بات کی عکاسی کرتی ہے کہ پالیسی سازی میں عوامی مفاد کو ترجیح نہیں دی جا رہی۔
انہوں نے حکومت سے مطالبہ کیا کہ پیٹرولیم مصنوعات کی قیمتوں میں کیا گیا اضافہ فوری طور پر واپس لیا جائے، جماعت اسلامی اس معاملے پر احتجاجی تحریک شروع کر رہی ہے اور اسی سلسلے میں شہر بھر میں احتجاجی مظاہرے منعقد کیے جائیں گے۔
منعم ظفر خان نے کہا کہ ملک میں ایک بڑی تعداد ایسی ہے جو روزمرہ آمد و رفت کے لیے موٹر سائیکل استعمال کرتی ہے اور اس طبقے کی تعداد کروڑوں میں ہے، لیکن پیٹرول کی قیمتوں میں مسلسل اضافہ اس طبقے کے لیے شدید مشکلات پیدا کر رہا ہے۔
ان کا کہنا تھا کہ خطے کے دیگر ممالک کے مقابلے میں پاکستان میں پیٹرول کی قیمتوں میں اضافہ غیر معمولی حد تک زیادہ ہے، جو عوام پر اضافی دباؤ کا باعث بن رہا ہے۔
انہوں نے اعلان کیا کہ ایک احتجاجی اجتماع رات آٹھ بجے ملینیم مال کے سامنے منعقد کیا جائے گا جس میں عوام کو درپیش مسائل پر آواز بلند کی جائے گی۔
کنٹونمنٹ بورڈز کی حلقہ بندیوں کے حوالے سے بات کرتے ہوئے منعم ظفر خان نے الزام عائد کیا کہ سندھ حکومت الیکشن کمیشن پر دباؤ ڈال رہی ہے تاکہ من پسند حلقہ بندیاں کروائی جا سکیں، اگر انتخابات سے قبل حلقہ بندیوں میں جانبداری برتی جائے تو یہ شفاف انتخابات کے تصور کے منافی اور ایک طرح کی قبل از وقت دھاندلی کے مترادف ہے، کراچی کے ساتھ ماضی میں مختلف سیاسی جماعتوں نے ناانصافیاں کی ہیں۔
آخر میں انہوں نے میئر کراچی پر بھی تنقید کرتے ہوئے کہا کہ ایک محاورے کے مطابق جسے ہر چیز درست دکھائی دے وہ حقیقت کا ادراک نہیں کر پاتا اور موجودہ میئر بھی اسی طرزِ فکر کے حامل نظر آتے ہیں کیونکہ انہیں شہر کے مسائل اور خراب صورتحال کے باوجود بہتری ہی دکھائی دیتی ہے، جبکہ حقیقت میں کراچی مختلف بنیادی مسائل کا شکار ہے اور اس کی حالت بہتر بنانے کے لیے سنجیدہ اقدامات کی ضرورت ہے۔