ضلع خیبر کے تھانہ ملوارڈ کی حدود میں واقع کڑپہ کے علاقے میں نامعلوم سمت سے داغا گیا مارٹر گولہ ایک رہائشی مکان پر آ گرا، جس کے نتیجے میں خواتین اور بچوں سمیت 7 افراد زخمی ہو گئے۔ واقعے نے علاقے میں خوف و ہراس پھیلا دیا اور مقامی آبادی میں شدید بے چینی کی لہر دوڑ گئی۔
نجی ٹی وی کی رپورٹ کے مطابق پولیس حکام نے بتایا کہ دھماکے کی اطلاع ملتے ہی امدادی ٹیمیں فوری طور پر موقع پر پہنچ گئیں اور زخمیوں کو ابتدائی طبی امداد کے بعد ڈوگرہ اور ایف سی اسپتال منتقل کیا گیا، جہاں انہیں مزید علاج فراہم کیا جا رہا ہے۔
حکام کا کہنا ہے کہ زخمیوں میں شامل ایک خاتون اور ایک بچے کی حالت تشویشناک ہے جبکہ دیگر متاثرہ افراد کی حالت نسبتاً خطرے سے باہر بتائی جا رہی ہے۔
واقعے کے بعد سیکیورٹی فورسز اور پولیس نے پورے علاقے کو گھیرے میں لے کر سرچ آپریشن شروع کر دیا ہے اور شواہد اکٹھے کیے جا رہے ہیں۔
ابتدائی طور پر مارٹر گولہ کہاں سے فائر کیا گیا اور اس کے پیچھے کون عناصر ملوث ہیں، اس حوالے سے تحقیقات کا دائرہ وسیع کر دیا گیا ہے تاکہ واقعے کی اصل حقیقت سامنے لائی جا سکے۔