آبنائے ہرمز میں بحری جہازرانی کو محفوظ اور معمول پر لانے کے لیے امریکا نے ایک نیا بین الاقوامی اتحاد تشکیل دینے کا منصوبہ تیار کر لیا ہے، جس کا مقصد اس اہم تجارتی گزرگاہ میں بحری نقل و حرکت کو لاحق خطرات میں کمی لانا بتایا جا رہا ہے۔
غیر ملکی ذرائع ابلاغ کی رپورٹس کے مطابق اس مجوزہ اتحاد کا نام ’’میری ٹائم فریڈم کنسٹرکٹ‘‘ رکھا گیا ہے اور اس کے ذریعے خطے میں تجارتی جہازوں کی محفوظ آمد و رفت کو یقینی بنانے کی کوشش کی جائے گی۔
بین الاقوامی خبر رساں اداروں کے مطابق اس منصوبے کا ذکر امریکی محکمہ خارجہ کی جانب سے مختلف ممالک میں تعینات سفارتخانوں کو ارسال کیے گئے ایک سرکاری مراسلے میں کیا گیا ہے، جس میں سفارتی عملے کو ہدایت دی گئی ہے کہ وہ دیگر ممالک کو اس مجوزہ اتحاد میں شمولیت پر آمادہ کریں۔
عالمی میڈیا رپورٹس کے مطابق یہ مجوزہ ڈھانچہ امریکا کی قیادت میں کام کرے گا اور اس کا بنیادی فوکس معلومات کے تبادلے، سفارتی رابطہ کاری اور خطے میں عائد پابندیوں کے مؤثر نفاذ پر ہوگا۔ اس کے ذریعے آبنائے ہرمز میں جہازرانی کو لاحق خطرات کم کرنے اور تجارتی راستوں کو محفوظ بنانے کی حکمت عملی اختیار کی جائے گی۔
میڈیا رپورٹس میں مزید بتایا گیا ہے کہ اس نظام کو امریکی محکمہ خارجہ اور امریکی سینٹرل کمانڈ کے باہمی اشتراک سے چلایا جائے گا۔ محکمہ خارجہ سفارتی سطح پر رابطوں اور ہم آہنگی کی ذمہ داری نبھائے گا جبکہ سینٹرل کمانڈ تجارتی جہازوں کے لیے فوری بحری معلومات کی فراہمی اور اتحادی افواج کے درمیان رابطوں کو مربوط بنانے کا کردار ادا کرے گی۔
ایک اعلیٰ امریکی عہدیدار کے حوالے سے یہ بھی کہا گیا ہے کہ یہ منصوبہ سابق امریکی صدر ڈونلڈ ٹرمپ کے سامنے موجود متعدد سفارتی اور پالیسی آپشنز میں سے ایک ہے، جس کا مقصد خطے میں اتحادی ممالک کے ساتھ مل کر آبنائے ہرمز کی صورتحال کو بہتر بنانا اور بحری گزرگاہ کو زیادہ محفوظ بنانا ہے۔
