لاہور: صوبہ پنجاب کے دارالحکومت لاہور کے علاقہ جاتی امرا میں مسلم لیگ ن کی اعلیٰ قیادت کی ایک اہم بیٹھک ہوئی، جس میں ملکی سیاست، معیشت اور خارجہ امور سمیت اہم ترین حکومتی معاملات پر مشاورت کی گئی۔
میڈیا رپورٹس کے مطابق وزیراعظم شہباز شریف نے مسلم لیگ ن کے قائد میاں نواز شریف سے ان کی رہائش گاہ جاتی امرا میں ملاقات کی، ملاقات میں نائب وزیراعظم اسحاق ڈار اور وزیراعلیٰ پنجاب مریم نواز بھی شریک تھیں۔
بتایا گیا ہے کہ ملاقات کے دوران معاشی ٹیم کی جانب سے مہنگائی اور حالیہ فیصلوں پر بریفنگ دی گئی، نائب وزیراعظم اسحاق ڈار نے پٹرولیم مصنوعات کی قیمتوں میں حالیہ اضافے کی وجوہات اور عالمی مالیاتی اداروں کے ساتھ ہونے والے معاہدوں کے تناظر میں معاشی حقائق سے آگاہ کیا۔
میاں نواز شریف نے پٹرولیم قیمتوں میں اضافے پر تشویش کا اظہار کرتے ہوئے زور دیا کہ حکومت عوامی مشکلات کو کم کرنے کے لیے ہنگامی اقدامات کرے، قیمتوں میں اضافے کا بوجھ غریب طبقے پر نہ ڈالا جائے اور انہیں ہر ممکن تحفظ فراہم کیا جائے۔
