آج دنیا بھر میں ماؤں کا عالمی دن نہایت عقیدت، محبت اور احترام کے ساتھ منایا جا رہا ہے۔ یہ دن ماں کی بے لوث محبت، قربانیوں، شفقت اور اولاد کے لیے دی جانے والی لازوال خدمات کو خراجِ تحسین پیش کرنے کے لیے مخصوص ہے۔
دنیا کے مختلف ممالک میں لوگ آج کے دن اپنی ماؤں سے محبت اور عقیدت کا اظہار کر رہے ہیں۔ کہیں تحائف دیے جا رہے ہیں، کہیں خصوصی تقاریب منعقد کی جا رہی ہیں جبکہ کئی افراد اپنی مصروفیات سے وقت نکال کر اپنی ماؤں کے ساتھ وقت گزار رہے ہیں۔
مدرز ڈے ہر سال مئی کے دوسرے اتوار کو منایا جاتا ہے، اسی وجہ سے اس کی تاریخ ہر سال تبدیل ہو جاتی ہے لیکن یہ دن ہمیشہ اتوار کو ہی آتا ہے۔ اس دن کا بنیادی مقصد ماں کے اس عظیم کردار کو سراہنا ہے جو وہ اپنی اولاد کی تربیت، پرورش اور بہتر مستقبل کی تعمیر کے لیے ادا کرتی ہے۔
ماں کو دنیا کا سب سے عظیم رشتہ قرار دیا جاتا ہے، جو اپنی اولاد کی خوشیوں کے لیے ہر قربانی دینے کو تیار رہتی ہے۔ ماں کی محبت کو بے مثال اور بے غرض کہا جاتا ہے کیونکہ وہ اپنی اولاد کے دکھ درد کو اپنا دکھ سمجھتی ہے اور ہر مشکل وقت میں ان کا سہارا بنتی ہے۔
مدرز ڈے منانے کی روایت بیسویں صدی کے آغاز میں شروع ہوئی۔ اس دن کو باضابطہ طور پر منانے کی تحریک امریکی خاتون انا جاروس نے شروع کی تھی، جنہوں نے اپنی والدہ کی خدمات کو خراجِ عقیدت پیش کرنے کے لیے اس دن کے قیام کی کوشش کی۔ ان کی مسلسل جدوجہد کے بعد سن 1914 میں اُس وقت کے امریکی صدر ووڈرو ولسن نے مئی کے دوسرے اتوار کو سرکاری طور پر مدرز ڈے قرار دیا۔
بعد ازاں یہ روایت دنیا بھر میں مقبول ہوتی گئی اور آج یہ دن عالمی سطح پر منایا جاتا ہے۔ مختلف ممالک میں اس دن کو الگ انداز میں منانے کی روایات موجود ہیں، تاہم ہر جگہ اس دن کا مقصد ماں کی عظمت کو سلام پیش کرنا اور ان کی محبتوں کا اعتراف کرنا ہوتا ہے۔
