سری نگر/جموں و کشمیر کے وزیر اعلیٰ عمر عبداللہ نے مجوزہ یکساں سول کوڈ (UCC) پر سوال اٹھاتے ہوئے کہا ہے کہ اگر بی جے پی کی زیر قیادت حکومت کے پاس اسے منظور کرانے کے لیے مطلوبہ اعداد و شمار موجود ہیں تو اسے پارلیمنٹ میں پیش کیا جانا چاہیے۔ انہوں نے کہا کہ قومی اہمیت کے قانون کا فیصلہ انفرادی ریاستوں کے ذریعے نہیں کیا جا سکتا۔سری نگر میں نامہ نگاروں سے گفتگو کرتے ہوئے عمر عبداللہ نے کہا کہ حکومت مختلف ریاستوں کے ذریعے یو سی سی نافذ کرنے کی کوشش کرنے کے بجائے اسے پارلیمنٹ میں کیوں نہیں لاتی۔ انہوں نے کہا، ’’اگر آپ کے پاس نمبر ہیں تو اسے پارلیمنٹ میں لائیں، مختلف ریاستوں کے ذریعے ایسا کیوں کیا جا رہا ہے؟‘‘
وزیر اعلیٰ نے بی جے پی کی زیر قیادت این ڈی اے میں موجود اختلافات کا بھی حوالہ دیتے ہوئے کہا کہ اگر حکومت کے اپنے اتحادی ہی اس اقدام کی حمایت کے لیے تیار نہیں ہیں تو پورے ملک میں یو سی سی نافذ کرنے کا جواز پیش کرنا مشکل ہوگا۔انہوں نے کہا کہ صرف بی جے پی کی حکومت والی ریاستوں میں یو سی سی نافذ کرنے سے یہ یکساں قانون نہیں بن سکتا، کیونکہ ملک میں کئی ایسی ریاستیں اور مرکز کے زیر انتظام علاقے ہیں جہاں بی جے پی کی حکومت نہیں ہے۔
عمر عبداللہ نے کہا کہ ’’پورا ملک بی جے پی کی حکومت والی ریاست نہیں ہے۔ کئی ریاستیں اور مرکز کے زیر انتظام علاقے ایسے ہیں جہاں بی جے پی کی حکومت نہیں ہے۔ لہٰذا اگر اسے صرف بی جے پی کی ریاستوں میں نافذ کیا جائے تو یہ یونیفارم یا یکساں قانون نہیں رہے گا۔‘‘انہوں نے مزید کہا کہ اس نوعیت کے قانون کا فیصلہ پارلیمنٹ میں ہونا چاہیے، کیونکہ پارلیمنٹ پورے ملک کی نمائندگی کرتی ہے۔ ان کے مطابق قومی نوعیت کے معاملے کا فیصلہ کسی ایک ریاست کے بجائے پورے ملک کی سطح پر ہونا چاہیے۔
بھارت اور چین کے درمیان لائن آف ایکچوئل کنٹرول (LAC) پر فوجی تعیناتی میں مبینہ کمی سے متعلق سوال پر عمر عبداللہ نے اسے ایک اہم پیش رفت قرار دیا اور امید ظاہر کی کہ وقت کے ساتھ لائن آف کنٹرول (LoC) پر بھی حالات بہتر ہوں گے۔انہوں نے کہا کہ ایل اے سی پر فوجی تعداد میں کمی ایک اہم پیش رفت ہے اور اسی طرح امید ہے کہ مستقبل میں ایل او سی پر بھی صورتحال میں بہتری آئے گی۔
دیگر ممالک کی جانب سے بھارت کی خارجہ پالیسی پر کیے جانے والے تبصروں کے بارے میں عمر عبداللہ نے کہا کہ بھارت کو نہ تو بیرونی ممالک کی منظوری کی ضرورت ہے اور نہ ہی ان کی تعریف یا تنقید کو ضرورت سے زیادہ اہمیت دینی چاہیے۔انہوں نے کہا، ’’ہماری خارجہ پالیسی ہماری اپنی ہے، ہم دوسرے ممالک کے سرٹیفکیٹ کیوں تلاش کریں؟‘‘
عمر عبداللہ نے کہا کہ اگر مستقبل میں کسی ملک کی جانب سے مخالفت کی جائے تو بھارت یہ نہیں کہہ سکتا کہ ہماری پالیسی میں مداخلت نہ کریں، جبکہ تعریف کی صورت میں اسے خوش آئند قرار دیا جائے۔انہوں نے کہا، ’’ہم نہ ان کی تعریف سننا چاہتے ہیں اور نہ ان کی مخالفت۔ ہماری خارجہ پالیسی ہماری اپنی ہے اور ہمیں اسی پر توجہ مرکوز کرنی چاہیے۔‘‘
