راجوری/راجوری پولیس نے پیر پنجال خطے میں مبینہ معاون نیٹ ورک کے خلاف جاری تحقیقات کے دوران تین افراد کو گرفتار کرکے ان کی نشاندہی پر ایک دیسی ساختہ دھماکہ خیز ڈیوائس (آئی ای ڈی) برآمد کرنے کا دعویٰ کیا ہے۔پولیس کے مطابق گرفتار افراد کی شناخت ذاکر حسین ساکن کوٹ چروال تریاٹھ، محمد اعظم ساکن کوٹ چروال تریاٹھ اور محمد مشتاق ساکن اودھن، راجوری کے طور پر ہوئی ہے۔
پولیس کا کہنا ہے کہ ابتدائی تحقیقات کے دوران یہ بات سامنے آئی ہے کہ تینوں افراد نے مبینہ طور پر پیر پنجال خطے میں سرگرم ’’لشکرِ طیبہ سے منسلک ایک گروپ‘‘کے ارکان کو رسد، محفوظ نقل و حرکت اور دیگر زمینی سطح کی معاونت فراہم کی۔
پولیس کے مطابق ملزمان نے مبینہ طور پر گروپ کے ارکان کے لیے بطور گائیڈ کام کیا اور انہیں کشمیر وادی کی جانب منتقل ہونے میں سہولت فراہم کی۔ پولیس دیگر واقعات کے ساتھ ان کے ممکنہ روابط کا بھی جائزہ لے رہی ہے۔
پولیس نے مزید بتایا کہ گرفتار افراد میں سے ایک کی جانب سے فراہم کردہ معلومات کی بنیاد پر ایک آئی ای ڈی برآمد کی گئی۔ ابتدائی تحقیقات کے مطابق مبینہ طور پر یہ آئی ای ڈی گروپ کے ارکان نے محفوظ رکھنے اور ممکنہ استعمال کے لیے مذکورہ شخص کے حوالے کی تھی۔
پولیس کے مطابق گرفتاریاں اور آئی ای ڈی کی برآمدگی وسیع تر نیٹ ورک کا سراغ لگانے اور اس میں ممکنہ طور پر ملوث دیگر افراد کی شناخت کے لیے جاری تحقیقات کا حصہ ہیں۔حکام نے کہا کہ تینوں گرفتار افراد کے مبینہ کردار کی مکمل نوعیت اور دیگر افراد و واقعات کے ساتھ ان کے ممکنہ روابط کا تعین کرنے کے لیے مزید تفتیش جاری ہے۔پولیس نے واضح کیا ہے کہ گرفتار افراد کے خلاف عائد الزامات تحقیقات اور قانونی کارروائی کے تابع ہیں۔
