خرطوم (انٹرنیشنل ڈیسک) سوڈان نے ایتھوپیا کے ساتھ سرحد پر اپنے فوجیوں کی ہلاکت کے بعد بڑی تعداد میں عسکری کمک بھیج دی۔ ذرائع ابلاغ کے مطابق خرطوم حکومت نے ایتھوپیا کے حملوں کے حوالے سے افریقی یونین کو شکایت بھی ارسال کی ہے۔ سوڈانی فوج کے بیان میں کہا گیا کہ ایتھوپیا کی ملیشیاؤں اور فوج کی جانب سے حملوں کا سلسلہ روکنے کے لیے ادیس ابابا حکومت کے ساتھ رابطہ کیا جا رہا ہے۔ سرحد کی خلاف ورزی کی کسی بھی کوشش کو پسپا کردیا جائے گا۔سوڈانی فوج نے بدھ کے روز ایک بیان میں سرحد پر اپنے اہل کاروں کی ہلاکت کا الزام ہمسایہ ملک کی فوج اور ملیشیا پر عائد کیا تھا۔ تجزیہ کاروں کا کہنا ہے کہ خرطوم حکومت نے کارروائی کا الزام ایتھوپیائی فوج اور اس کی حمایت یافتہ ملیشیا پر عائد کیا، جس کے بعد سرحد پر مسلح جھڑپوں کے خدشات بڑھ رہے ہیں۔
