سابق امریکی باسکٹ بال کے مشہور کھلاڑی اسٹیفن جیکسن نے اسلام قبول کرلیا اور دائرہ اسلام میں داخل ہونے کا اعلان خود انسٹاگرام پر کیا۔
غیرملکی خبررساں ادارے کے مطابق معروف امریکی باسکٹ بال کھلاڑی اسٹیفن جیکسن نے اسلام قبول کرنے کا اعلان سوشل میڈیا کے پلیٹ ٖفارم انسٹاگرام پر کیا اور اس حوالے سے ایک وڈیو بھی شیئر کی جس میں وہ دائرہ اسلام میں داخل ہونے کیلیے مسجد میں سب دوستوں کے سامنے کلمہ طیبہ پڑھا۔
دائرہ اسلام میں داخل ہونے کے بعد معروف کھلاڑی کو مشہور شخصیات اور چاہنے والوں کی جانب سے مبارکباد اور نئے سفر کے لیے نیک تمناؤں کا سلسلہ شروع ہوگیا ہے۔
اسٹیفن جیکسن نے اپنے باسکٹ بال کے 14 سالہ کیرئیر میں 14 سیزن کھیلے اور 12 ہزار سے زائد پوائنٹس اسکور کیے لیکن اس کے علاوہ انہوں نے کھیل کے میدان میں اپنے ساتھی کھلاڑیوں کو 2 ہزار 634 پوائنٹس اسکور کرنے میں بھی مدد دی۔
واضح رہے کہ امریکی باسکٹ بال کی ٹیم کے سابق کھلاڑی اسٹیفن جیکسن امریکی ریاست ٹیکساس کے شہر ہیوسٹن میں پیدا ہوئے تھے اور انہوں نے 1997ء میں باسکٹ بال کیریئر کا آغاز کیا اور 2014ء میں ریٹائر ہوئے۔
