ترک حکام نے ملک بھر میں وسیع پیمانے پر کی جانیوالی کارروائیوں میں داعش کے 18 مشتبہ ممبران کو گرفتار کر لیا ہے۔
سرکاری خبررساں ایجنسی انادولو نے منگل کو بتایا کہ انسداد دہشتگردی ٹیموں نے مجموعی طور پر 21 افراد کو گرفتار کرنے کیلئے ملک کے سب سے بڑے شہر استنبول، جنوب مشرقی صوبوں باتمان ،شانلی عرفا اور جنوبی صوبہ آدانا کے 27 مقامات پر بیک وقت چھاپے مارے۔
اس میں کہا گیا ہے کہ کارروائیوں میں نشانہ بنائے جانیوالے افراد پر داعش کو مالی مدد فراہم کرنے اور استنبول میں گروہ کی سرگرمیوں میں ملوث ہونے کا الزام ہے۔ انادولو کے مطابق اب تک ان میں سے 18 افراد کو حراست میں لے لیا گیا ہے اور باقی 3 افراد کی گرفتاری کیلئے کارروائیاں جاری ہیں۔ داعش کو 2015 سے ترکی میں مہلک حملوں کے سلسلے کا ذمہ دار ٹھہرایا جاتا ہے۔ جس کے جواب میں ترکی کے انسداد دہشتگردی دستے ملک بھر میں اس گروہ کے اراکین کیخلاف کارروائیاں کر رہے ہیں۔
