کراچی (اسٹاف رپورٹر)پاکستان سپر لیگ 7 کی فرنچائزڈ ملتان سلطانز کے کپتان محمد رضوان نے کہا ہے کہ ہماری پلاننگ مکمل ہے اور ہم پی ایس ایل میں ایک بھرپور منصوبہ بندی کے تحت جائیں گے، آئی سی سی کی جانب سے ملنا والا ایوارڈ ورلڈ کی سطح پر ہے اور اس میں پاکستان کا نام آیا ہے جس کی بہت خوشی ہے،پی ایس ایل میں ہماری ٹیم اپنے اعزاز کا دفاع کرنے کے لیے نہیں بلکہ ایک نئی منصوبہ بندی کے تحت جائے گی اور بھرپورکارکردگی کا مظاہرہ کرنے کی کوشش کرے گی۔ انہوں نے اتوار کو ورچوئل پریس کانفرنس کرتے ہوئے کہا کہ پاور پلے میں کم یا زیادہ رنز کرنے کا مسئلہ نہیں بلکہ پیچ کے معیار اور ڈیمانڈ کے مطابق بیٹنگ کرنی پڑتی ہے، جیسی پیچ ہوتی ہے پاور پلے میں اس ہی طرح سے رنز ہوتے ہیں۔ محمدرضوان نے کہا کہ بابراعظم کی بیٹنگ کے حوالے سے کمزوریوں کے بارے میں بہت ساری باتیں مجھے معلوم ہیں اور ان کو بھی میرے متعلق معلوم ہے لیکن مسئلہ یہ ہے کہ بولر جب تک ڈیلیور نہیں کرے گا اس وقت تک کامیابی حاصل نہیں ہوگی۔
