اسلام آباد: وزیر خزانہ شوکت ترین نے کہا ہے کہ عالمی مالیاتی ادارے (آئی ایم ایف) نے پاکستان سے متعلق چھٹے اقتصادی جائزے کی منظوری دے دی جس کے تحت ایک ارب ڈالر قرض مل سکے گا۔
سماجی روابط کی ویب سائٹ ٹوئٹر پر انہوں نے آئی ایم ایف کی جانب سے منظور کیے گئے اقتصادی جائزے کو خوش آئند قرار دیا۔
I am pleased to announce that IMF Board has approved 6th traunche of their programme for Pakistan.
— Shaukat Tarin (@shaukat_tarin) February 2, 2022
خیال رہے کہ آئی ایم ایف ایگزیکٹیو بورڈ کا اہم اجلاس ہوا جس میں پاکستان سے متعلق چھٹے اقتصادی جائزے کی منظوری دی گئی۔
تفصیلات کے مطابق اس قبل پاکستان کی درخواست پر دو بار اجلاس ملتوی کیا گیا تھا، آئی ایم ایف نے اسٹیٹ بینک ترمیمی بل کی منظوری کیلئے وقت دیا تھا تاہم تمام پیشگی شرائط پوری ہونے پر آئی ایم ایف ایگزیکٹو بورڈ کےاجلاس میں پاکستان کے لیے چھٹے اقتصادی جائزہ کے ساتھ ایک ارب ڈالر جاری کرنے کی منظوری دی ہے۔
پاکستان کا چھٹا اقتصادی جائزہ منظوری کے بعد پروگرام ٹریک پر آگیا آئی ایم ایف پروگرام ٹریک پر آنے کے بعد عالمی بینک اور ایشیائی ترقیاتی بینک سمیت دیگر ڈونر سے بھی فنانسنگ ملے گی۔
علاوہ ازیں وزارت خزانہ کے حکام نے امید ظاہر کی کہ پاکستان کے زرمبادلہ کے ذخائر بہتر ہوں گے اور اسٹاک مارکیٹ سمیت دیگر اقتصادی اعداد و شمار بھی بہتر ہوں گے۔
