کراچی (اسٹاف رپورٹر) سندھ ہائی کورٹ کے چیف جسٹس احمد علی ایم شیخ نے ریمارکس دیے ہیں کہ اشیا خوردونوش کی قیمتوں کا تعین کرنا عدالت کا کام نہیں ہے۔ منگل کوکراچی میں دودھ کی قیمت میں من مانے اضافے کے خلاف درخواست پر کمشنر کراچی نے رپورٹ جمع کرادی۔ چیف جسٹس کا کہناتھا کہ ہر چیز کے نرخوں میں اضافہ ہوا ہے‘ عدالت کس کس چیز کی قیمت کے تعین کا حکم دے؟کل کو کہیں گے، چینی اور آٹے کی قیمت کا تعین بھی عدالت کرے‘ اشیا خوردونوش کی قیمتوں کا تعین کرنا عدالت کا کام نہیں ہے۔ چیف جسٹس نے درخواست پر سماعت بغیر کارروائی کے ملتوی کردی۔
