سیالکوٹ گیریژن میں شارٹ سرکٹ کے باعث گولہ بارود کے شیڈ میں آگ لگ گئی

پاک فوج نے کہا ہے کہ سیالکوٹ گیریژن میں شارٹ سرکٹ کے باعث گولہ بارود کے شیڈ میں لگنے والے آگ پر فوری طور پر قابو پالیا گیا اور کسی قسم کا کوئی نقصان نہیں ہوا۔

پاک فوج کے شعبہ تعلقات عامہ (آئی ایس پی آر) کے جاری کردہ بیان کے مطابق سیالکوٹ گیریژن میں گولہ بارود کے شیڈ میں شارٹ سرکٹ کے باعث حادثاتی طور پر آگ بھڑک اٹھی تھی۔

بیان میں بتایا گیا کہ آگ لگتے ہی بروقت کارروائی کرتے ہوئے نقصان کو فوری طور پر روکا گیا اور آگ بجھادی گئی۔

آئی ایس پی آر نے بتایا کہ واقعے میں کسی قسم کا جانی یا املاک کو نقصان نہیں پہنچا۔

خیال رہے کہ سیالکوٹ کے رہائشیوں کی جانب سے سماجی روابط کی ویب سائٹ ٹوئٹر پر فجر کے وقت پر دھماکوں کی آوازیں سنائی دینے کی شکایات کی گئیں تھی۔

Sialkot right now. @OfficialDGISPR some people says fire in the systme but continuously gun firing? pic.twitter.com/F43ULS4SSD

— یسار باکی (@yassar_baki) March 20, 2022

بعدازاں کچھ سوشل میڈیا پر ویڈیو بھی گردش کرنے لگیں جس میں آگ بھڑکتے اور دھواں اٹھتے دیکھا۔

مختلف ٹوئٹس میں مقامی افراد نے دعویٰ کیا تھا کہ آگ کینٹ کے علاقے میں کسی اسلحہ ڈپو میں لگی ہے۔

اس کے ساتھ ساتھ سوشل میڈیا پر مختلف قسم کی افواہیں بھی گردش کرنے لگی تھیں اور سیالکوٹ ٹوئٹر پر ٹاپ ٹرینڈ کرنے لگا۔

منبع: ڈان نیوز