اسلام آباد (صباح نیوز) پاکستان مسلم لیگ(ن) کے صدر اور قومی اسمبلی میں قائد حزب اختلاف شہباز شریف اور پاکستان پیپلز پارٹی کے چیئرمین بلاول زرداری نے کہا ہے کہ تحریک عدم اعتماد کا سامنا کرنے کے بجائے پی ٹی آئی حکومت کے تاخیری حربے ناقابل برداشت ہیں، عمران خان اور ان کے حواریوں کو بھاگنے نہیں دیں گے۔ پی پی پی میڈیا سیل کی جانب سے منگل کے روز سوشل میڈیا پر جاری بیان میں کہا گیا ہے کہ بلاول زرداری اور شہباز شریف کے درمیان ٹیلی فونک رابطہ ہوا ہے، اس دوران ملکی سیاسی صورت حال پر تبادلہ خیال کیا گیا، دونوں رہنمائوں نے اس بات پر اتفاق کیا کہ تحریک عدم اعتماد کا سامنا کرنے کے بجائے پی ٹی آئی حکومت کے تاخیری حربے ناقابل برداشت ہیں، اپوزیشن جماعتیں عوام کیخلاف عمران خان کے معاشی جرائم پر انہیں کسی صورت معاف نہیں کریں گی۔
