کیف‘واشنگٹن (اے پی پی) یوکرین میں ایک ریلوے اسٹیشن پر روسی راکٹ حملے میں30 سے زیادہ افراد ہلاک اور100 سے زائد زخمی ہو گئے ہیں۔ یوکرین کے ریلوے سربراہ نے میڈیا کو بتایا کہ روسی فوج کی طرف سے کراماتورسک ریلوے اسٹیشن پر2 میزائل فائر کیے۔ کراما تورسک ریلوے اسٹیشن روسی فوج کی بمباری کے زیر اثر علاقوں سے شہریوں کو نکالنے کے لیے استعمال کیا جاتا ہے۔ علاوہ ازیں امریکا نے 3 روسی ائرلائنز پر پابندی عاید کردی ہے۔ فرانسیسی میڈیا کے مطابق امریکی محکمہ تجارت نے کہا کہ امریکی حکومت نے یوکرین جنگ کے باعث عاید پابندیوں کی خلاف ورزی پر روسی سرکاری ائرلائن ایروفلوٹ کے ساتھ 2 دیگر فضائی کمپنیوں کی امریکی کارگو لانے اور لے جانے پر پابندی عاید کردی ہے۔
