کراچی (سید وزیر علی قادری) گزشتہ روز دنیا کی تیسری بلند ترین چوٹی کینچن جونگا کو سر کرنے کے بعد ایک پیغام میں سرباز خان نے مداحوںز کا شکریہ اور اپنی محفوظ واپسی کیلئے دعاؤں کی درخواست کی ہے۔ واضح رہے کہ انہوں نے تمام 14 بلند پہاڑوں کو سر کرنے کا عزم کر رکھا ہے۔اس مہم کا آغاز انہوں نے 2007 میں نانگا پربت کو سر کرکے کیا تھا جس کے بعد انہوں نے 2018 میں کے ٹو کو سر کیا۔2019 میں انہوں نے براڈ پیک، لوہٹسے اور مناسلو چوٹی سر کی جبکہ 2021 میں سرباز نے انا پورنا، ماؤنٹ ایوریسٹ، گیشربرم ٹو اور داولاگیری کو سر کیا۔واضح رہے کہ سرباز خان نے 2019 میں لوہٹسے، جو کہ دنیا کی چوتھی بلند ترین چوٹی ہے، کو بغیر مصنوعی آکسیجن سپلائی کے سرکیا تھا اور وہ ایسا کرنے والے پہلے پاکستانی کوہ پیما بن گئے تھے۔کینچن جونگا کے بعد وہ اس ماہ مکالو چوٹی سر کرنے کا ارادہ رکھتے ہیں جبکہ اس ہی سال وہ گیشربرم ون بھی سر کرلیں گے جس کے بعد وہ چو ایو اور شیش اپنگما کو سرکریں گے۔
